ഒരു മൂന്നു നാല് പതിറ്റാണ്ട് മുമ്പ് ഇലന്തൂര്ക്കാര് അധികമൊന്നും വിമാനമെന്ന അത്ഭുത സാധനം അടുത്തു കാണാന് ഇടയില്ല. അന്നും ഇലന്തൂര്ക്കാര് ചിലരൊക്കെ സിങ്ങപ്പൂരിലും പേര്ഷ്യയിലും ഒക്കെ പോയി ജോലി ചെയ്തിരുന്നു. പത്തേമാരിയിലും കപ്പലിലും ഒക്കെ ദിവസങ്ങളും മാസങ്ങളും യാത്ര ചെയ്യേണ്ടി വന്നിരുന്ന കാര്യം പഴയ ആള്ക്കാര് ഓര്ക്കുന്നുണ്ടാവണം.
എന്നാല് ഇന്ന് അതല്ലല്ലോ സ്ഥിതി.
ഇലന്തൂര്ക്കാരും അവരുടെ കൂട്ടാളികളായ മദ്ധ്യ തിരുവിതാംകൂര് ദേശക്കാരിലും വിദേശ ബന്ധം ഇല്ലാത്ത ഭവനങ്ങള് അധികമൊന്നും ഇല്ല എന്ന രീതിയില് ആയിരിക്കുന്നു ഇപ്പോഴത്തെ സ്ഥിതി.
ഇന്ന് ഗള്ഫിലെ മലയാളി മൂന്നു നാലു മണിക്കൂറുകള്ക്കകം വിമാനത്തില് കേരളത്തില് എത്തും. പക്ഷെ അത് തിരുവന്തപുരത്തോ ആലുവയിലോ മലപ്പുറത്തോ ഒക്കെ ആയിരിക്കുമെന്നു മാത്രം. കാശുണ്ടെങ്കില് നല്ല ഒരു കാര് അടിച്ചു വിട്ടു മൂന്നാലു മണിക്കൂറുകള്ക്കകം തിരുവല്ലാ-കൊഴെന്ചേരി-ഇലന്തൂര്-പത്തനംതിട്ട ദേശക്കാര്ക്ക്, അതായത് പത്തനംതിട്ട ആലപ്പുഴ ജില്ല ക്കാര്ക്ക് കുറച്ചു നാള് മുമ്പ് വരെ വീട്ടില് എത്താന് കഴിഞ്ഞിരുന്നു.
എന്നാല് ഇന്നോ ?
റോഡ് ബ്ലോക്കും ട്രാഫിക്കും ഒക്കെ കാരണം ധന നഷ്ടവും സമയ നഷ്ടവും ഒക്കെ ദിനം പ്രതി കൂടി വരുന്ന അവസ്ഥ ആയിരിക്കുന്നു.
അപ്പോള് ഒരു അന്താരാഷ്ട്ര വിമാനത്താവളം മദ്ധ്യ തിരുവിതാംകൂറില് വന്നെങ്കില് എന്ന് അതിന്റെ ഇല്ലായ്മയുടെ വിഷമതകള് അറിഞ്ഞ മലയാളി ആഗ്രഹിച്ചു പോയെങ്കില് അവരെ കുറ്റം പറയാന് പറ്റില്ല.
എന്നാല് ഒരു റോഡ് പോലും ഒരു ദശകത്തില് നല്ല പോലെ പണിഞ്ഞു കൊടുക്കാന് പറ്റാത്ത ഒരു സര്ക്കാര് ആണ് ഇന്ത്യയില് എന്ന് അറിയാത്ത ഒരു ഇന്ത്യക്കാരനും കാണില്ല. അപ്പോള് ആ സര്ക്കാര് ഒരു നാട്ടിന് പുറത്തു വിമാന ത്താവളം പണിഞ്ഞു തരുമെന്നു ഒരുത്തരും കരുതി കാണില്ല.
ഒന്നാലോചിച്ചാല് ഈ മദ്ധ്യ തിരുവിതാംകൂര് ദേശത്തു വിമാനത്താവളം പോയിട്ട് ഒരു ചെറിയ ചന്ത പണിയാനുള്ള സ്ഥലം പോലും കിട്ടുകയില്ല എന്ന് ആര്ക്കാണ് അറിയാത്തത് ? കേരളത്തിനു വെളിയില് സര്ക്കാരുകള് പാവങ്ങളെ അടിച്ചിറക്കി ഭൂമി ഏറ്റെടുക്കുന്നതു പോലെയൊന്നും മദ്ധ്യ തിരുവിതാം കൂറില് നടപ്പില്ല. നിരപ്പായ വെളി പ്രദേശം എന്നത് വെള്ളം കയറി കിടക്കുന്ന നിലം പ്രദേശങ്ങള് മാത്രം. അല്ലങ്കില് ചില കുന്നും പ്രദേശങ്ങള്. മറ്റുള്ള സ്ഥലങ്ങള് ചന്തമുള്ള ആധുനിക കെട്ടിടങ്ങളെ കൊണ്ട് നിറഞ്ഞിരിക്കുന്നു.
വസ്തുതകള് അങ്ങനെ ആയിരിക്കെ ഒരു നാരങ്ങാനം അച്ചായന് അമേരിക്കയില് നിന്ന് സ്വരുക്കൂട്ടിയ തന്റെ സ്വന്തം സമ്പാദ്യം കൊണ്ട് കൊഴെന്ചെരിക്കും ആറന്മുളക്കും ഇടയില് വെറുതെ കിടന്നിരുന്ന നൂറില് പരം ഏക്കര് നെല് പാടങ്ങള് തന്റെ ഒരു സ്വപ്ന പദ്ധതിക്ക് വേണ്ടി വാങ്ങിക്കൂട്ടിയത് ഒരു വലിയ അപരാധം ആയി എന്ന് പറയാന് പറ്റില്ല.
അതില് നിന്ന് ഒരു കാര്യം മനസ്സിലായി കാണുമല്ലോ. സ്വന്തം കാശ് മുടക്കിയാലും ഇന്ത്യയില് സംരംഭങ്ങള് തുടങ്ങാന് ഒന്നും സാധ്യമല്ല. സര്ക്കാര്, എന്നുവച്ചാല് , രാഷ്ട്രീയ മേധാവികളും ഉദ്യോഗസ്ഥ മേധാവികളും അങ്ങനെ പല തരാം മേധാവികളും കനിയണം. അവരൊക്കെ അങ്ങനെ ചുമ്മാതെ കനിയത്തില്ല എന്നതും ഇതിനോടകം നമുക്കൊക്കെ മനസ്സിലാക്കാവുന്നതേ ഉള്ളൂ.
ഉടക്കിട്ടു വേട്ടയാടുന്നതു പോലെ ഒരു കളിയാണ് ഇതൊക്കെ. അങ്ങനെ തോന്നുന്നില്ലേ ?
ഏതായാലും നാരങ്ങാനം അച്ചായന് കാശും സമയോം മാനോം കളഞ്ഞു തെക്ക് വടക്ക് ഓടി നടന്നിട്ട് കാര്യമായൊന്നും നടന്നില്ല. പല പ്രാവശ്യം പല തരം അനുവാദങ്ങള് നേടി നാട്ടുകാര്ക്കും നേതാക്കള്ക്കും അനുകൂലിച്ചും എതിര്ത്തും സംഘടിക്കാന് അവസരം ഒരുക്കി എന്നത് മാത്രം മിച്ചം. വെള്ളം കെട്ടി കൃഷിയിറക്കാതെ പുല്ലും കളയും വളര്ന്നു കിടന്ന പാട ശേഖരത്തില് കുറെ മണ്ണ് കൂടി ഇട്ടു നിരത്തി പുല്ലു പോലും കിളിര്ക്കാത്ത പരുവത്തില് ആക്കിയെടുത്തത് ആണ് ഇതിനോടകം നടന്ന ഏക താവളപ്പണി.
സാധാരണ ഗതിയില് നാട്ടുകാര് വികസനം വികസനം എന്ന് മുറവിളി കൂട്ടുകയാണ് പതിവ്. എന്നാല് കാലം കുറെ ചെന്നപ്പോള് ആറന്മുളയില് കാര്യം വേറെ ആയി. അവിടത്തുക്കാര്ക്ക് നസ്രാണി അച്ചായന്റെ സ്വകാര്യ വിമാനത്താവളമെന്ന പരിപാടി സുഖിക്കാതെ ആയി. അച്ചായന് എല്ലാവരെയും വണങ്ങി പ്രീതിപ്പെടുത്താന് കഴിഞ്ഞു കാണില്ലായിരിക്കാം. അപ്പോള് അച്ചായന് കുറെ നാട്ടു പ്രമാണി മാരെ ക്കൂടി താവള കമ്പനിയില് ഡയരക്ടര്മാര് ആക്കി. അപ്പോള് താവളത്തെ എതിര്ത്താല് ചില ഗുണം കിട്ടുമെന്ന് മറ്റുള്ളവര്ക്ക് കൂടി മനസ്സിലായി.
കേരളത്തിലെ കഴിഞ്ഞ തവണത്തെ ഇടതു മുഖ്യ മന്ത്രി താവളം പണിയാന് വെള്ളക്കൊടി കാട്ടിയപ്പോള് പലരും വിചാരിച്ചതു അധികം താമസിയാതെ ആറന്മുളയുടെ മീതെ ബോയിങ്ങും എയര് ബസും ഒക്കെ വട്ടമിടുന്ന കാലം എത്തി പ്പോയി എന്നാണു. അന്നാല് ആ മുഖ്യന് പ്രതിപക്ഷത്തായപ്പോ കാലു തിരിച്ചു ചവിട്ടുമെന്നു പലരും കരുതിയില്ല എന്ന് വേണം കരുതാന്.
എന്നാല് അതും നടന്നു. നാരങ്ങാനം അച്ചായന് പ്രായം കൂടി കൂടി വരുന്നു. അദ്ദേഹം താവളം പണി എന്ന തന്റെ സ്വപ്ന പദ്ധതിയില് നിന്ന് വിരമിക്കാന് അവസാനം തീരുമാനം എടുത്തു എന്ന് പറഞ്ഞാല് മതിയല്ലോ.
അങ്ങനെ ആണ് ഇലന്തൂരില് വേരുള്ള ഒരു ചെന്നൈ കമ്പനി അതിലും വലിയ ചില കമ്പനികളുടെ ഒത്താശയോടെ ആറന്മുളയിലെ ഈ സംരംഭം നാരങ്ങാനം അച്ചായനില് നിന്നും ഏറ്റെടുത്തത്. ആ ഏറ്റെടുപ്പിന്റെ ഗുലുമാലുകള് അവിടെ നിക്കട്ടെ. അതില് നമുക്ക് വലിയ കാര്യം ഒന്നുമില്ല.
ഈ സമയമാണ് കേരളത്തിലെ തല്ക്കാല വലതു സര്ക്കാര് ആറന്മുള വിമാനത്താവളമെന്ന സംരംഭത്തില് പേരിനെങ്കിലും ഒരു പങ്കാളിത്തമെടുത്തു പദ്ധതി ഊര്ജിതപ്പെടുത്താന് തീരുമാനിക്കുന്നത്. അവിടവിടെ എതിര്പ്പ് കാര് ബഹളം വച്ചെങ്കിലും സര്ക്കാര് ഉറച്ചു നില്ക്കുന്നു എന്ന് അറിഞ്ഞപ്പോള് ഒരു പക്ഷെ അമേരിക്കയിലെയും ഗള്ഫിലെയും ഒക്കെ തിരുവിതാംകൂറുകാര് സന്തോഷിച്ചിരിക്കാം.
അപ്പൊ ദാ, ഒരു പറ്റം ജന പ്രതിനിധികള് എതിര്പ്പുമായി എത്തിയിരിക്കുന്ന വാര്ത്തകള് വരുന്നു. അവരില് ഇടതും വലതും ഉണ്ട് എന്നത് ആശ്ചര്യം ജനിപ്പിക്കുന്നു. നാട്ടില് ഒരു നല്ല കാര്യം ചെയ്യിക്കാന് ഇവര്ക്കാര്ക്കും ഇതുവരെ പറ്റിയിട്ടില്ല. അത് പോട്ടെ. ഒരു നല്ല കാര്യം ചെയ്യാന് സമ്മതിക്കുകയും ഇല്ലെന്നു വന്നാല് എന്ത് ചെയ്യും ? ഇവരെ ഇങ്ങനെ ഒടക്കിടാനാണോ ജനങ്ങള് തെരഞ്ഞെടുത്തു വിടുന്നത് ?
പരിസ്ഥിതി പ്രശ്നമെന്ന അറിഞ്ഞുകൂടാത്ത കാര്യം പറഞ്ഞു എന്തിനും ഓടക്കാം എന്നത് ഒരു നല്ല കാര്യമല്ല. അങ്ങനെ വിചാരിച്ചാല് കാട്ടില് തുണിയില്ലാതെ ജീവിക്കുന്നതായിരിക്കും ഏറ്റവും അഭിലഷണീയമായത്.
പക്ഷേ, പരിസ്ഥിതി പ്രശ്നമല്ല ശരിയായ കാരണം. ആറന്മുളയില് കാടും വനവും ഒന്നുമില്ലല്ലോ. കാട് പോലെയുള്ള നാട്. ആ നാടന് കാടുകളില് അവിടവിടെ പലരുടെയും വീടുകളും പറമ്പുകളും. കുറെ ഏക്കര് താവളത്തിനായി വാങ്ങിയ സ്ഥലമുണ്ട്. അതുകൊണ്ട് മാത്രം വിമാനത്താവളം പ്രവര്ത്തിക്കാനാകില്ല. അപ്പോള് അവിടവിടെ യായി കുറെക്കൂടിയൊക്കെ സ്ഥലങ്ങള് അക്ക്വയര് ചെയ്യേണ്ടിവരും. ചിലരുടെയൊക്കെക്കൂടി വീടും പറമ്പും പോയെന്നിരിക്കും. അതിനുപരി മറ്റു ചിലരുടെ സ്ഥലങ്ങള്ക്ക് പല തരത്തിലുള്ള സാധ്യതകള് തെളിഞ്ഞു എന്നും വരാം. ചിലര്ക്ക് കൂടുതല് പ്രയോജനം. ചിലര്ക്ക് അതില്ല. അപ്പോള് അനുകൂലവും പ്രതികൂലവുമായ നിലപാടുകള് നാട്ടുകാരില് തന്നെ വന്നെന്നിരിക്കും.
എന്നാല് ഇത് വിമാനത്താവളത്തിന്റെ മാത്രം കാര്യമല്ല. ഇന്ന് ഇന്ത്യയില് ഏതുതരം പൊതു പദ്ധതികളും അഭിമുഖീകരിക്കുന്ന പ്രശ്നം. പൊതുവായി എല്ലാവര്ക്കും പ്രയോജനം വരുന്ന രീതിയില് കാര്യങ്ങളെ രൂപകല്പന ചെയ്യാന് വിമുഖത കാണിക്കുന്ന നേതാക്കളും സാങ്കേതികരും ഉദ്യോഗസ്ഥ പ്രമുഖരും വിരാജിക്കുന്ന ഒരു രാജ്യത്ത് ഇങ്ങനെ ഒക്കെ ആയാല് അതില് അതിശയം എന്തിരിക്കുന്നു? ഇനി പത്ര മാധ്യമങ്ങളുടെ കാര്യമോ ? കാര്യങ്ങളുടെ വാസ്തവ സ്ഥിതി ജനങ്ങളെ അറിയിക്കാന് ബാധ്യത ഉള്ള അവര് ചെയ്യുന്നത് പക്ഷേ അര്ത്ഥ സത്യങ്ങളും വാസ്തവ വിരുദ്ധതകളും പുറത്തു വിട്ടു ജനങ്ങളെ ഇളക്കി അവരുടെ ചന്ത വില കൂട്ടാനും വരുമാനം കൂട്ടാനും മാത്രമാണ് എന്ന് കരുതണം.
വലതന് ഓക്കെ പറഞ്ഞാല് ഇടതന് ഒടക്കും. ഇടതന് ഓക്കെ പറഞ്ഞാല് വലതന് ഒടക്കും. വലതനും ഇടതനും ഓക്കെ പറഞ്ഞാല് അകത്തൂന്നെ ഒടക്കും. ഒടക്കാതിരിക്കണേ ഒറ്റ വഴി മാത്രം. ദീപ സ്തംഭം മഹാശ്ചര്യം, നമുക്കും കിട്ടണം പണം ! പണമില്ലേ മറ്റു ചിലതായാലും മതി. എങ്ങനെ ഇരിക്കുന്നു കാര്യങ്ങളുടെ കിടപ്പ് ?
വിമാന താവളം ആറന്മുളയില് നമുക്കങ്ങു വേണ്ടെന്നു വയ്ക്കാം. മണ്ണിട്ട് മൂടിയ ആ സ്ഥലം എന്ത് ചെയ്യും ? സിന്ഗൂരില് ടാറ്റയെ പണി പകുതി കഴിഞ്ഞപ്പോ ഓടിച്ച പോലെ ആകും കാര്യങ്ങള്.
ഒടക്കുകയും എതിര്ക്കുകയും ചെയ്യുന്നത് ജനാധിപത്യ വ്യവസ്ഥിതിയുടെ മൌലിക അവകാശം എന്നാണു ഈ കഴിഞ്ഞ ദിവസം ഒരു പഴയ വിപ്ലവകാരിയും ഇപ്പോഴത്തെ ഒരു സാമൂഹ്യ പ്രവര്ത്തകനും ആയ ഒരാള് ടി വി ചാനല് ഷോ യില് തുറന്നടിച്ചത് . അതില് അക്രമാസക്തമാകുന്നതും നല്ല കാര്യം എന്നാണു അദ്ദേഹം പറഞ്ഞത്. അതിനെ പിന്താങ്ങുന്ന ചെറു തലമുറയിലെ കുട്ടികളെയും അതില് കാണാനായി.
എല്ലാവരും എല്ലാവരുടെയും രീതിയില് ശരിയായിരിക്കാം. എന്നാല് എല്ലാവരും എല്ലാവര്ക്കും ശരിയായ രീതിയില് കാര്യങ്ങള് കാണാന് ശീലിക്കുന്നത് ആയിരിക്കും എല്ലാവര്ക്കും നല്ലത്.
തീയില് ജീവിതം ഹോമിക്കാന് വെമ്പുന്ന ഇയ്യാം പാറ്റകളെ പോലെ ആവരുത് മനുഷ്യ ജീവിതം ! അതില് ഒരു കുഴപ്പവുമില്ല എന്ന് പറയുകയം അതുപോലെ പ്രവര്ത്തിക്കയും ചെയ്യുന്നവര് ധാരാളം കാണുമെങ്കില് പോലും !